深水埗，一個新舊集結嘅地方，大家都知道呢度有黃金、高登、鴨記、譚仔、維記，除左食野買野，黎影相多數都係影下鴨記地攤、街邊檔，或者一年唔知幾多度嘅電腦節，似乎好少影下風景相，今日同大家去影下深水埗夜景。
小弟家住深水埗，十幾年來，自問都幾熟深水埗嘅路，但係玩左相機都好幾年，都仲未正式影過下成個深水埗，剛剛尋晚天氣幾好，我又吉到時間出黎，就決定去影下深水埗嘅夜景！由深水埗港鐵D2出口出發，行廿分鐘左右就會到到一個小山嘅山頂，算係市區一個幾方便影下相嘅地方。
先講講今次去影相我帶左乜先：
Body：Canon EOS 7D：我部愛機！Lens：
Sigma 30mm f1.4 DC EX：成晚用得最少，只係出發時沿路Snap下。
Sigma 10-20mm f3.5 DC EX：主力鏡頭，八成相都係用佢影，一支幾好嘅鏡。
Contax Planar 85mm f1.4：我手頭上最貴一支鏡，想用返多啲抵啲！
Carl Zeiss Jena Sonnar 135mm f3.5：用得第二少，不過上山影，有支長焦可以以防萬一。
電筒：夜晚上山比較黑，一開始上山就冇路燈，一定要帶支以防萬一
腳架：要影夜景，想手持，就算有防震都太勉強，一定一定一定要帶！因為路唔係咁難行，帶支大少少嘅腳架都可以。
水：天時熱帶水就一定要架啦，因為唔知你會想影幾耐，帶定啦！
一個相機背囊，咁就出發。
點行去，下面我會比個地圖大家睇，成晚我影左大概兩個鐘來固山上同港鐵，如果大家第一次上去就可能預多一頭半個鐘安全啲。以下主要係相片分享，如果唔想睇，直接飛到最底睇地圖吧！
上山有幾個位真係好暗，我都開左電筒，之後行到開揚啲嘅地方，就有月光同埋少少地面燈光見到，上到山頂平地，我同我部相機都比月光照左出黎了。
先影影天空，市區始終都係市區，太大光害，好勉強叫影到幾燈星星。
以下大部分相都係爆光5-10秒，光圈f8-11，ISO100-400色溫2500-3000K，大家可以參考一下。再影一影石硤尾同白田邨，好光！影呢張相個位比較出，有少少危險，大家要小心！
長沙灣，少啲燈光，可能因為見得少馬路，冇乜街燈，遠遠見到果條應該係昂船洲大橋，有錯請指正。
換支85mm，影下夜晚仍然好旺的欽洲街。
睇下，本身可以睇到對面海架！比呢啲樓擋晒…
月光和燈光之下，我十分喜愛的深水埗。
下面幾張相用左少少特別方法影，唔係PhotoShop黎架，幾特別，大家估唔估到係點影架呢？
其實今次最主要係想同大家分享下呢個影相位置，可以影到深水埗、長沙灣、石硤尾，日景夜景一樣唔錯，不過影市區，夜晚多啲燈光係影得感覺開心啲！路線方面，我整個左Google Map，以後如果有咩推介，我都盡量用Google Map去話比大家知，等大家可以去影相方便啲，不過我本身影風景係行山多，其實攝影熱點希望大家都可以多多交流！
Google Map：2012/07/28 20:35 - 深水埗的後山
在較大的地圖上查看2012/07/28 20:35 - 深水埗的後山
沒有留言:
張貼留言